Hallo zäme,
ig versuches oh mal und möcht e chlini Zämefassig vo mim erste GP-Start schribe.
Isch zwar scho e Momänt här, ig hoffe, ig überchumes no uf d Reihe ;-).
Aui Löifer us der Nochberschaft hei immer gschwärmt wie cool und schön dä Louf sig. Auso hami dä Frühlig mou agmäudet. De Start isch zwar grad e Wuche nachem Sämpacher-HM gsi aber aus Gnusslöifer isch mir das eigendlech nid so wichtig.
So bini Am Samstig nachem Mittag mit de ÖV richtig Bärn. D Afahrt isch kes Problem gsi. Isch fasch gsi wie amene Arbeitstag. Ig pändle regumässig uf Bärn. Im Tram Nr.9 isches no nie so äng gsi! Es het nach Dul-X und Schweis gschmöckt.
Ufem gross Stargländ acho, hani zersch mou müesse luege, was isch wo. D Starnummere hani schnäu gha. S Wärtsachedepot hani o gfunge. Nume d Garderobe und Duschine hani nid uf Anhieb gfunge. Und wius grägnet het, und ig kei Schirm bimer ha gha, hami wie vieli angeri o, ir Halle vo de Wärtsache umzoge.
Übere Lutschprächer hani ghört, 15:45. Langsam hami ufgmacht zum Start. De Adrang bi de Wärtsache isch immer no riesig gsi.
Auso, use a liecht Räge und langsam zum Start jöggerlet. Bim Start si aui Blöck scho markiert gsi. Je witer füre me isch cho, je meh Löifer si gstange. Ändleich bini bi 'mim' Startblock 3 acho. Wüu ig s erstmau bi gstartet, hani bir Amäudig säuber chönne bestimme. Ha mou 1:10 aus Richtzit agä.
Nach 3-4 Minute warte isch de Startschuss für 'üse' Block gfaue und de Hufe het sech langsam i Bewegig gsetzt. Wie immer, hamer vornoh nid z schnäu z starte, um ir 2'te Häufti no Resärve z ha.
De Aargouerstalde ab isch e chli müehsam gsi. Trotz der breite Stross, viu Gedränge. Ir Autstadt hets trotz Räge viu Zueschouer gha. Dert ahni oh de Pacemaker für 1:10 ighout und nach churzer Zit überhout. S loufe uf de nasse Pflaschtersteine isch vorauem bi abfaunder Strecki recht gfährlech gsi. Ig ha de eint oder anger Usrütscher gseh. Ändlech isch es flach worde und de Ungergrund het uf Ther gwächsled. Vor luter Vorsicht, und ufpasse mit niemerem zämezstosse, hani gar nüm gwüsst wie wit mir scho si gloffe. Do isch scho d 5 km Zwüschezitmässig cho. OK, wie üblech, hani dert mi chlin Check gmacht:
-Duet öpis weh? = Aus OK!
-Schneuer wärde, oder z schnäu? = glich schnäu.
-Wie gseh die nöchste km us? = Weiss nid, bi s erst mou hie.
Die nöchste 2 km si flach, mehrheitlech der Aare noche gsi und rächt locker gsi. De isch d Abzweigig cho i Dälhölzli-Waud und es het afo stige. De Ungergrund het uf Grien und Waldwäg gwächselt. Do ig nid ha gwüsst wie läng die Stigig isch, hanis öpis langsam agange. D Stigig isch stercher worde. Womer usem Waud use si cho, hani gwüsst, es isch gschafft, die nöchste 1-2 km gö abwärts. Inzwüsche hani de nöchst Pacemaker (1:08) ighout und grad überhout. Do isch o scho de nöchst Verpflegigsposchte mit Wasser-Iso-Wasser cho. Das isch super organisiert gsi und es het gnueg Häufer gha wo eim d Getränk hei greicht. Bir 10 km Zwüschezit wieder mi Check:
-Duet öpis weh? = Aus OK!
-Schneuer wärde, oder z schnäu? = glich schnäu.
-Wie gseh die nöchste km us? = Weiss nid, bi s erst mou hie.
Ok, no 6 km. Das söt kes Problem si. öpä ab km 11 hets liecht afo stige. Woni d 12 km Marge ha gseh bini scho e chli froh gsi, wieder eine weniger.
Witer isches de Hoger düruf. Ändlech isches wieder flecher worde. Es isch übere Bundesplatz und wider über Pflaschtersteine dür d Autstadt. Wieder hets es paar 90 Grad Kurvene gha. Dasmou sisi kes Problem gsi. S Fäud vo de Löifer het sech usenangzoge gha.
Die erste Gedanke a Aargouerstaude si uftoucht. Wie wirds si? Locker, oder doch hert wieme hie und do het gläse? Do isch scho d Brügg und d Abzweigig links de Hoger ufe cho. Wie wit geits no? Isch d 15 km Marge scho düre? Ah nei, der chunt si grad. No 1 km das geit no und d Stigig isch o grad gschafft. Isch eigendlech nüt speziells gsi, haut wie e Stigig so isch, geit haut opsi ;-). De letscht Kilometer isch aber glich no ä länge worde. Churz vorem Ziu het mi de Pacemaker mit 1:08 ufem Numero wider ighout. Ändspurt? Nid würklech de Aargouerstaude het si Würkig hingerloh. Auso eifach so schnäu wie müglech! Ah gschafft!
OK, so schnäu wie müglech de Chip abgäh und nid die 50 Franke Buess riskiere. D Banane und de Bido mit Iso hani gärn gnoh. bim Zrügloufe hani o gseh wo d Duschine und d Garderobene si (isch o nid schwär gsi, wiu au Löifer si derhäre glüffe). Nachem Dusche und d Wärtsache hole hets grad glängt für uf e Bus a Bahnhof. Im Zug den d Ranglischte im Internet ufgrüeft und gseh 1:08:02. Ig bi ganz zfride füre erscht Start. Go gloub nöchst Johr wieder.
Es isch e schöne Louf gsi. Nid so schön wie de Luzärner Marathon/HM, aber das cha ou am Wätter gläge ha.

Liebi Grüss
Kurt

Sali Kurt, gratuliere der zo

Sali Kurt,
gratuliere der zo däre super ziit am GP!! E hoffe das e nächst johr o mol am start be. De GP Bärn esch scho lang uff minere Wunschliste. Schöne Suntig u merci för dä schön gschrebeni brecht! Nätte gruess vo me Huttwiler..

Gratuliere für dini guete Ziit

Hoi Kurt,

das het mi scho gefreuet, des du hesch geschriibet in Schwiizerdütsch. Hän chön alles läse un verstaa.
Musch wisse, bin nämlich a Dütsche :-) - dem deep_blue_sea sin Frauli.

Supi Ziit hesch gelaufe, mini Hochachtig au vo em Stalde.

Guete Erholig und Gruss us em Aargau

Ute

Hoff, du chasch min Biitrag go läse :-)

Laufen berührt die Sinne, verwöhnt unsere Seele und macht uns stark, das Leben in allen Situationen anzunehmen.

Hoi deep_blue_sea, Danke.

Hoi deep_blue_sea,
Danke. Dütsch het haut nid zu mine Lieblingsfächer ir Schueu ghört.
Aber egau, es geit jo nid um Literatur Nobelpris.
De Huttubärg ghört zu mine Lieblings-Träningsstreckene.

Hoi Ute, Danke. Irgendwie

Hoi Ute,
Danke. Irgendwie hani das bim schnuppere i dine Biträg mitübercho, dass du ursrünglech usem grosse Kanton chunsch.
Danke dir für dini Biiträg.
Wünschter aus Guete, keini Verletzige und häb Sorg zum Huttwiler.

Darstellungsoptionen

Wählen Sie hier Ihre bevorzugte Anzeigeart für Kommentare und klicken Sie auf „Einstellungen speichern“ um die Änderungen zu übernehmen.

Google Links